Një i moshuar në Lushnje është arrestuar në flagrancë për posedim pa leje të armës së zjarrit. Policia thotë se 75-vjeçarit iu gjet gjatë kontrollit personal arma e zjarrit me krehër e 7 fishekë të vendosur në të.
Gjithashtu, shërbimet e policisë bëjnë me dije se qytetari ishte në gjendje të dehur.
Materialet i kaluan prokurorisë pranë gjykatës së shkallës së parë Fier për veprime të mëtejshme.
Njoftimi i Policisë
Lëvizte në sheshin e Bashkisë Lushnjë, i armatosur me armë zjarri dhe në gjendje të dehur, vihet në pranga 75-vjeçari.
Shërbimet e Policisë sekuestruan armën e zjarrit tip pistoletë, me krehër dhe fishekë të vendosur në të.
Shërbimet e Komisariatit të Policisë Lushnjë, pas informacioneve të marra nga inteligjenca informative se 1 shtetas i cili ndodhej në sheshin e Bashkisë Lushnjë, kishte armë zjarri me vete, vlerësuan informacionin dhe shkuan menjëherë në vendngjarje, ku bënë të mundur kapjen dhe arrestimin në flagrancë të këtij shtetasi, i cili ishte në gjendje të dehur.
Gjatë kontrollit personal, në brez, iu gjetë 1 armë zjarri pistoletë bashkë me krëhërin me 7 fishekë.
Në vijim të veprimeve, specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin Z. K., 75 vjeç, banues në Lushnjë, për veprën penale “Prodhimi dhe mbajta pa leje e armëve dhe municionit luftarak”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
